Kyzylorda-News.kz

 

    Қызылорда облысының өңірлік коммуникациялар орталығында Елбасының 5 институционалдық реформасын жүзеге асыру бойынша «100 нақты қадам» Ұлт жоспарының энергетика саласын реформалау бағытындағы 50, 51, 52 және 59-шы қадамдарының өңірімізде орындалуы жөнінде брифинг өтті. Брифингке облыстық энергетика және тұрғын үй – коммуналдық шаруашылық басқармасының басшысы Ержан Әбдіқалықов және «Қызылорда электр тарату тораптары компаниясы» АҚ-ның басқарма төрағасы, облыстық «Энергия» Консорциумының төрағасы Мұхитжан Кәрімбаев қатысты.
    - Бүгінге сала қондырғылардың, инфрақұрылымның барынша тозуынан тарифтің ашық емес жүйесі қалыптасқан. Бұл мәселелерді шешу үшін «Бірыңғай сатып алушы» үлгісін енгізу қажет. Электр энергиясын сатып алудың орталықтандырылуы аймақтар арасындағы тарифтік айырмашылықты түзетуге және тарифтің өсуін қадағалауға мүмкіндік береді, - деді Е.Әбдіқалықов.
    Айта кету керек, Ұлт жоспарының тапсырмаларын жүзеге асыру мақсатында Қызылорда облысының өңірлік энергетикалық кешенін дамытудың тұжырымдамасы әзірленуде. Тұжырымдаманың негізгі мақсаты облысты сенімді және сапалы энергиямен қамтамасыз ету, бәсекеге қабілетті энергия өндіруші ірі кәсіпорындар қалыптастыру, облыстың энергетикалық тәуелсіздігіне қол жеткізу болып табылады.
    Шынар БЕКБАН