Kyzylorda-News.kz

 

    Байқоңыр қаласы әкімшілігінде тұңғыш ғарышкер Юрий Гагариннің ғарыш әлемін бағындырғанына 55 жыл толуына орай дайындық пен іс-шаралар өткізу жөніндегі жұмыс тобының отырысы өтті, - деп хабарлады қала әкімшілігінің БАҚ-пен байланыс бөлімінен.
    Әкімшілік басшысының орынбасары, топ жетекшісі Николай Адасев мерекелік шаралардың 11 сәуірде басталатынын жеткізді. Осы күні қалалық мәдениет сарайында «Біздің Гагарин» атты тақырыптық көрме, салтанатты жиын және концерттік бағдарлама назарға ұсынылады.
    Негізгі шаралар легі келесі күні жалғасады. Мәдениет, жастар саясаты, туризм және спорт басқармасының бастығы Юрий Петровский 12 сәуірде №2 алаңнан қалаға дейін жеңіл атлеттер жүгіретінін атап өтті. «Гагариндік марафонға» 50 шақты адам қатыспақ.
    Оқушылар Королев даңғылы бойындағы эстафетада бақ сынайды. Сондай-ақ байқоңырлық спортшылардың қатысуымен велошеру ұйымдастыру жоспарланып отыр.
    Осы күні қалада көпшілік шаралар өтеді. Тұңғыш ғарышкердің ескерткіші маңында салтанатты митингтен бастап концерттік бағдарламаға дейін жалғасады.
    Қала халқы мен қонақтарының көңілін Ресей мен Қазақстан артистері, сондай-ақ Қызылорда облыстық филармониясының өнерпаздары көтеруге тырысады.