Kyzylorda-News.kz

 

    Қызылорда қаласының бас жоспарына сәйкес Сырдарияның сол жағалауындағы 1532 гектар аумақты игеру жұмыстары қолға алынған. Жоспарға сәйкес өзен арқылы өтетін ұзындығы 386, ені 22 метрді құрайтын көпір салынып жатыр, деп хабарлады «24 кз».
    Құрылыс 2014 жылдың жазында басталған. Құны 6 миллиард теңгеге жуықтайтын көпірдің тіреулері бұрғыланып, бетондалып, аралық дәнекер балкалары құйылды. Қазір құрылыс басындағы жұмысшы тобы негізінен жергілікті мамандардан жасақталған. Сондай-ақ қажетті материалдар да осы өңірден шыққан өнімдер. Көпір құрылысын биыл аяқтау жоспарланған.
    Равиль Ахунов, «МО-25» ЖШС учаске басшысы:
    - Көпірдің құрылымы күрделі. Өзен табанынан 30 метр тереңдікте бұрғылау және тіреу бағаналарын орнату қиындық туғызды. 110 құрылысшы үздіксіз 2 ауысымда жұмыс жасауда. Қазірде өткелге міну және түсу жолдарының негізін қалаудамыз.
    Сейілхан Тойбазаров, облыстық құрылыс, сәулет және қала құрылысы басқармасы басшысының орынбасары:
    - Бұл көпір қаланың ескі және жаңа бөлігін байланыстыратын болады. Сол көпір жалғасы есебінде 6,5 шақырымдық негізгі магистралдық жол Шіркейлі каналы арқылы «Батыс Еуропа-Батыс Қытай» халықаралық жолына шығуды қамтамасыз етеді.