Kyzylorda-News.kz

 

    Қызылорда облыстық жастар ресурстық орталығының ұйымдастыруымен Әлем чемпионатының күміс жүлдегері Алмас Өтешов «Болашақ» университетінің ұжымымен кездесті. «Қоғам» телеарнасы хабарлағандай, спортшы жанкүйерлеріне алғыс білдірді.
    Алмас Өтешов Жаңақорған ауданында қарапайым жанұяда дүниеге келген. Оқушы кезінде қазақ күресінен жарыстарға қатысып, онан соң ауыр атлетикаға ауысқан. Жеңістері жетерлік. Спорт мектебінің түлегі. Студенттермен, оқытушылармен жүздесуде жүзге тарта мемлекеттің спортшылары қатысқан Хьюстондағы чемпионаттан алған әсерімен бөлісті.
    15 жылдан бері ауыр атлетика саласында тер төгіп келе жатқан Алмас үшін 2012 жылы Елбасымен кездескен сәт өте ерекше. «Оның «Қара бала, сен алысқа шаптың» деген сөзінен қара терге түсіп, еңсем көтеріліп қалды», - дейді Сыр елінің мақтанышы. Бапкері Илья Ильиннің зілтемір көтерудің қыр-сырларын үйретуде септігі зор екенін жеткізді.
    Жиналғандар Алмастың биік белестерден көрінуіне тілек білдірді. «Қай салада болса да, жеңіске адал, таза еңбекпен жетуге болады», - дейді Алмас. Кездесу соңында спорт саласының дамуына үлес қосқаны үшін облыс жастарының оған атынан алғыс хат және естелік сыйлық табыс етілді.