Kyzylorda-News.kz

 

   «Бизнестің жол картасы - 2020» бағдарламасы жүзеге асырылған уақыттан бастап құны 24 млрд. теңгеге жуық 300-ден астам жобаның несиелері бойынша пайыздық ставкалары субсидияланып, 1 млрд. 300 млн. теңгенің 93 жобасына мемлекет тарапынан кепілдік ұсынылды. Бұл туралы бүгін «Сыр медиа» ЖШС жанындағы ОКО-ның брифингінде облыстық кәсіпкерлік және туризм басқармасының басшысы Мирас Төлебаев хабарлады.

    - Ауылдық жерлердегі кәсіпкерлер үшін банктен 14 пайызбен берілген несиенің 10 пайызын мемлекет субсидиялайды. Кәсіпкердің 4 пайызбен несие қаражатын алуға мүмкіндігі бар. Осы бағытта бағдарламаның шарттарын халыққа кеңінен жеткізу үшін облыстық кәсіпкерлік және туризм басқармасы, «Даму» қоры және өңірлік кәсіпкерлер палатасы құрған арнайы жұмыс тобы ай сайын ауылдарды аралап, насихаттау жұмыстарын тұрақты түрде жүргізуде. Соның өзінде кейбір аудандар тарапынан жобалар өте аз. Биылғы жылы Арал, Қазалы, Қармақшы аудандарының кәсіпкерлері бағдарламаға белсенді қатысса, Жалағаш ауданынан бір жоба ғана ұсынылып, Сырдария ауданынан бірде-бір жоба қатыстырылмады, - деді М.Төлебаев.
    2014 жылы облысымыз бірінші болып, Арал, Қазалы, Жалағаш және Шиелі аудандарында индустриялық аймақ құрып, республикалық бюджеттен 834 млн. теңге қаражат қорғады. Бұл қаражаттар құрылған индустриялық аймақтарға қажетті инфрақұрылым жүйелерін жеткізуге бағытталды.
    Шынар БЕКБАН