Kyzylorda-News.kz

    Конференцияның ашылу салтанатының алдында Қазақстанның ғылыми және шығармашылық зиялы қауымының жетекші өкілдерінен құралған делегация Қазақ хандығының негізін қалаушы – Керей мен Жәнібек хандардың  ескерткішіне гүл шоқтарын қойды. Делегацияны Қазақстан Республикасының Мемлекетттік хатшысы Гүлшара Әбдіқалықова бастап барды.
    Конференция жұмысына 1500-ден астам адам қатысты. Қатысушылардың  қатарында ҚР Парламентінің депутаттары, мемлекеттік органдар басшылары, Қазақстанның мемлекет және қоғам қайраткерлері, дипломатиялық  өкілдіктердің  басшылары, судьялар, отандық саяси партиялардың, ҮЕҰ-ның, бизнес-қоғамдастықтың, Қазақстан халқы Ассамблеясының өкілдері, мәдениет және өнер қайраткерлері, БАҚ жетекшілері, сондай-ақ Әзірбайжан, Болгария, Ұлыбритания, Германия, Израиль, Үндістан, Испания, Италия, Қырғыз Республикасы, Қытай,  Беларусь, Тәжікстан, Ресей, АҚШ, Түркия, Өзбекстан, Украина, Франция, Швейцария сынды мемлекеттерден тарих пен мемлекеттіліктің даму проблемаларын зерттейтін ірі  ғалым-зерттеушілер бар.
    Пленарлық отырыста ҚР Мемлекеттік хатшысы Г.Әбдіқалықова Қазақстан Республикасының Президенті Нұрсұлтан Назарбаевтың конференцияға қатысушыларға және шетелдік қонақтарға арналған құттықтау  хатын оқыды.
    Мемлекет басшысының құттықтауында Қазақ хандығы құрылуының 550 жылдығын бүкіл халық болып мерекелеу – бір шаңырақтың астында өзара келісімде өмір сүріп жатқан барша қазақстандықтардың бірлігінің жарқын көрінісі. Біз өткенімізді мақтан тұтамыз және ата-бабаларымыздың сан ғасырлық армандарын ақиқатқа айналдыра отырып, олардың асыл мұраларын қастерлейміз.
    «Мәңгілік Ел» жалпыұлттық идеясы тарихи сананың берік іргетасына арқа сүйейді. Бұл қазақстандық патриотизмнің маңызды қыры. Қазақстандық тарихшылардың Қазақ хандығының құрылуының, қалыптасуы  мен дамуының тарихи үдерісіне, халқымыздың тарихи жолына терең талдау жасап, зерттеу жұмыстарын  жалғастыра беруі маңызды, деп атап көрсетілді.
    Сонымен бірге, Әзірбайжан, Моңғолия, Түркия ұлттық ғылым академиясының президенттері, Ресей ғылым акадамиясының мүшелері баяндама жасады.
    Пленарлық отырыс аяқталғаннан кейін қоғам және мемлекет қайраткерлері, ғалымдар, тарихшылар, этнологтар, шығыстанушылар, тіл мамандары «Қазақ хандығы және Н.Ә. Назарбаевтың «Мәңгілік Ел» идеясы»; «Қазақ хандығынан – Қазақстан Республикасына дейін: тың деректер, жаңаша тұжырымдамалар»; «Қазақ құқығы мен билер сотының әлем өркениетіндегі орны» және  «Тәуелсіз Қазақстанның әлемдік қоғамдастықтағы орны» деп аталатын төрт секция бойынша отырысты жалғастырды.
    Секциялар жұмысына сондай-ақ жас ғалымдар, докторанттар, магистранттар мен студент жастар қатысты.