Kyzylorda-News.kz

 

   2020 жылдан бастап барлық азаматтар табыс декларациясын тапсырады. Бұл туралы бүгін Мәжілісте «Қазақстан Республикасының кейбір заңнамалық актілеріне жеке тұлғалардың табыстары мен мүлкін декларациялау мәселелері бойынша өзгерістер мен толықтырулар енгізу туралы» заң жобасының тұсаукесерінде белгілі болды, деп хабарлайды BNews.kz тілшісі.

    «Қазақстанда барлық жеке тұлғалардың табыстары мен мүлкін декларациялауды енгізу туралы шешім қабылданды, себебі қазіргі уақытта барлық жеке тұлғалардың табыстары мен мүлкінің шыққан көздеріне тиімді бақылау жоқ. Сонымен қатар табыстар мен мүлік туралы декларацияны адамдардың шектелген тобы (мемлекеттік қызметшілер, депутаттар, судьялар) ғана ұсынады. Осыған байланысты «Қазақстан Республикасының кейбір заңнамалық актілеріне жеке тұлғалардың табыстары мен мүлкін декларациялау мәселелері бойынша өзгерістер мен толықтырулар енгізу туралы» заң жобасы әзірленді», - деп баяндады ҚР Қаржы министрі Бақыт Сұлтанов.
    Заң жобасына сәйкес, табыс пен мүлікті декларациялау жүйесін кезең-кезеңімен енгізу көзделген. Мәселен, 2017 жылы жеке тұлғалардың дайындалған санаты ретінде мемлекеттік мекемелер, ұлттық компаниялар мен мемлекеттік кәсіпорындардың қызметшілері декларация ұсынады. Ал 2020 жылдан бастап барлық жеке тұлғалар декларация тапсырады.
    «Осылайша, Қазақстанның барлық кәмелетке толған азаматтары, оралмандар және тұруға ықтиярхаты бар тұлғалар, тіркелген мүлік болған кезде кәмелетке толмаған тұлғалар, сондай-ақ ел аумағында мүлкі болған немесе салық салынбаған табысы болған кезде шетелдіктер де декларация тапсырады», - деп толықтырды министр.