Kyzylorda-News.kz

 

    Қазақстан үшін айтулы күнде, яғни Тоқтар мен Талғаттың даңқты жолын жалғастырған Айдын Айымбетов ғарышқа ұшқан күні, Назарбаев зияткерлік мектебіне қазақстандық әскери ұшқыш Александр Сорокин қонаққа келіп, зияткер оқушылармен жүздесті, деп хабарлады мектептің баспасөз қызметі.

    Сорокин Александр Николаевич Харьковтің ұшқыштар жоғары әскери училищесін, Ю.Гагарин атындағы Әскери-әуе академиясын бітірген. Қызметін авиаполкте ұшқыш болып бастады. Аға ұшқыш, звено командирі, эскадрилья штабының бастығы, эскадрилья командирінің орынбасары, командирі, авиаполк командирі сияқты әскери жолдан өтті. 2007 жылы Қазақстан Республикасы Президентінің жарлығына сәйкес Әскери-Әуе күштері Қарулы күштері Бас қолбасшысы қыметіне тағайындалды. ІІ дәрежелі «Даңқ» орденімен, медальдармен марапатталған.
    Оқушылар дайындаған экскурсия барысында Александр Сорокин нано, биотехнология, робототехника және экономика кабинеттерінің жұмысын көріп, балалардың ғылым саласындағы жетістіктерімен танысты. Сондай-ақ мектеп жатақханасын аралап, балалардың сапалы білім алуына мектеп тарапынан үлкен көмектер жасалынатынына ризашылығын білдірді.
    Арт-студия жанында орын тапқан түрлі қолөнер бұйымдары мен картиналар көрмесі Сорокин мырзаның көңіліне үлкен қуаныш ұялатты. Тіпті кәсіби суретшілердің қолынан келе бермейтін әсем картиналарды дүниеге әкелген зияткер оқушылар өздерін  нағыз талантты да талапты жастар екенін көрсете білді.
    Облыс экономикасын дамытуға арналған жобалармен айналысуға мүмкіндік беретін аймақтық экономика кабинетіне бас сұққан  Александр Николаевич балалардың көкейлерінде жүрген сауалдарына үлкен қызығушылықпен жауап берді. Сондай-ақ қазақстандық авиацияның бүгінгі жай-күйімен таныстырып, өзінің өмір жолы мен ұшқыштық қызметі жайында сыр шертті.