Kyzylorda-News.kz

 

    Қосымша білім беру жүйесіне Экономикалық ынтымақтастық және даму ұйымы елдерінің стандарттарын енгізу қажет. Бұл туралы бүгін елімізде балалар үшін қосымша білім жүйесін дамыту жөніндегі республикалық конференцияда  Білім вице-министрі Есенғазы Иманғалиев мәлім етті, деп жазады ҚазАқпарат.
    «Биыл қосымша білімнің жаңа стандарты күшіне еніп, оның апробациясы басталады. Сондықтан да Мемлекет басшысы білім беру жүйесінің алдына өте үлкен мақсатты жүктеп отыр. Осы тұрғыда екі векторды атап өткен жөн. Біріншісі - бұл «Қазақстан-2050» Стратегиясы бойынша еліміздің алдыңғы қатарлы отыз мемлекеттің қатарына енуі. Ал екінші вектор - Экономикалық ынтымақтастық және даму ұйымы елдері стандарттары. Біз қазақстандық білім беруде елеулі жетістіктерді қол жеткізген елдердің стандарттарын енгізуіміз қажет»,-деді министрдің орынбасары.
    Осы орайда ол Қазақстанда білім беру стандарттарын жаңарту түрлі үйірмелер арқылы балалардың қосымша білімі жүйесін жақсарту мақсатында жүргізіліп жатқандығын жеткізді. Бүгінде елімізде қосымша біліммен 1,6 млн мектеп оқушысы қамтылған екен.
    Талқылаулар барысында конференцияға қатысушылар тиісті ұсыныстарды қабылдады. Оның арасында қосымша білім беру саласындағы бірқатар ұйымдардың оңтайлы тәжірибесін енгізу шаралары бар.  Атап айтқанда, Ақтөбе қаласының техникалық шығармашылық орталығының, Павлодардағы балалар техникалық мектебінің, БҚО-дағы балалар-жасөспірімдер туризм орталығының, сондай-ақ өзге де ұйымдардың үздік тәжірибесі ерекше назарға алынбақ.