ҚАМШЫБЕК – ПРЕЗИДЕНТ КУБОГЫНЫҢ ИЕГЕРІ, ДӘМЕТКЕН – ҚОЛА ЖҮЛДЕГЕР
Жерлесіміз Қамшыбек Қоңқабаев Астана қаласында бокстан VI ҚР Президенті кубогы үшін өткен халықаралық турнирде жеңімпаз атанды.
16 елдің былғары қолғап шеберлері қатысқан дүбірлі бәсекеде Қазақстан құрамасы 10 алтын, 6 күміс, 12 қола медальмен жалпы есепте көш бастады.
Қамшыбек 91 келіден жоғары салмақта бақ сынасып, екінші мәрте қатарынан жеңіс тұғырына көтерілді. Ол жарыс барысында үш кездесу өткізіп, үшеуінде жеңіске жетті. Қамшыбектің алдағы жоспары Олимпиада ойындарына жолдама алу үшін келесі жылы Сочиде өтетін лицензиялық Әлем чемпионатына дайындалады.
Сондай-ақ, айтулы додада қызылордалық Дәметкен Келімбет 57 келі салмақ дәрежесінде сынға түсіп, турнирдің қола жүлдесін иеленді.
Қос спортшы да облыстық жоғары спорт шеберлігі мектебінде жаттығады.
