ҰЛЫ ОТАН СОҒЫСЫНЫҢ АРДАГЕРІ ТӘНЕШ ОРАЗОВ 95 ЖАСҚА ТОЛДЫ
Облыс әкімі Қ.Көшербаев құрметті зейнеткер, соғыс және еңбек ардагері Тәнеш Оразовты мерейтойымен құттықтады. Ұлы Отан соғысының ардагері Тәнеш Оразов 1923 жылы 23 ақпан күні Сырдария ауданының Шіркейлі ауылында туған. 1941 жылдың желтоқсанында әскерге шақырылып, Ашхабад жаяу әскер училищесінде оқып, лейтенант әскери шенінде майданға аттанады.
«Тәнеш Оразұлы – бүгінгі өскелең ұрпақ үшін үлгі-өнеге. 1942 жылы Сталинградты жаудан қорғауға қатысып, ерен ерлік үлгісін көрсетті. Соғыстан кейінгі жылдары облысымыздың әлеуметтік-экономикалық дамуына ерекше үлесін қосты. Мәскеу жоғары сауда мектебін бітіріп, сауда, құрылыс саласында лауазымды қызметтерін абыроймен атқарып, нәтижелі қызметтің арқасында көптеген мемлекеттік наградалармен марапатталды», - деді аймақ басшысы.
Аймақтың әлеуметтік-экономикалық дамуына сіңірген еңбегі үшін Тәнеш Оразулына Қызылорда облысының Құрмет грамотасы табысталды. Сондай-ақ, мерейтой иесін облыстық ардагерлер кеңесінің төрағасы Сейілбек Шаухаманов бастаған бір топ ардагерлер құттықтады.
