ҚЫЗЫЛОРДАДА 19 ШЕТЕЛ АЗАМАТЫ ЕЛ АУМАҒЫНАН АЛАСТАТЫЛДЫ
20-22 ақпан аралығында Қызылорда облысы аумағында шетелдіктердің құқықтарын сақтай отырып, олар тарапынан орын алатын заң бұзушылықтарды дер кезінде анықтап, тиісті шара көруге бағытталған «Мигрант» жедел-профилактикалық іс-шарасы өткізілуде. Аталған іс-шараға ОІІД-нің 353 қызметкері жұмылдырылып, көші-қон заңнамаларын бұзу деректерін анықтау, оларды әкімшілік жауапкершіліктерге тарту мақсатында шетелдіктердің уақытша тіркелген мекен-жайлары, салынып жатқан құрылыс нысандары, базарлар мен дәмханалар тексеріліп, рейдтік іс-шаралар жүргізілді.
Нәтижесінде шараның бір күнінде шетелдіктің немесе азаматтығы жоқ адамның ҚР халықтың көші-қон саласындағы заңнамасын бұзу дерегі бойынша 131 шетел азаматы анықталып, шетелдіктерді және азаматтығы жоқ адамдарды қабылдайтын жеке немесе заңды тұлғалардың ҚР-ның халықтың көші-қон саласындағы заңнамасын бұзғаны үшін 9 ҚР азаматына, шетелдік жұмыс күшін және еңбекші көшіп-келушілерді ҚР заңнамасын бұза отырып тарту, шетелдіктің немесе азаматтығы жоқ адамның ҚР еңбек қызметін заңсыз жүзеге асыру дерегі бойынша 4 ел азаматына әкімшілік шаралар көрілді.
Ел шекарасын заңсыз кесіп өткен бір өзбек азаматына қатысты ҚР Қылмыстық кодексінің 392-бабының 1-бөлігімен сотқа дейінгі тергеп-тексеру жұмыстары басталды. Бұған қоса, Қырғызстан Республикасының 3 азаматы және Өзбекстан Республикасының 16 азаматы республика аумағынан аластатылды.
Сонымен қатар, іс-шара барысында көші-қон заңнамаларын бұзуға жол берген 61 шетелдіктің ел аумағында болу мерзімдері қысқартылды.
Қызылорда ОІІД баспасөз қызметі
