ЖАҢА БАҒДАР ЖЕТІСТІККЕ ЖЕТКІЗЕДІ
Жаппай жаһандану кезеңінде математикалық білімі бар мамандар сұранысқа ие болып қана қоймай, еліміздің жаңа бағдарын жасайтын болады. Бұл туралы бүгін Қызылордада Елбасының «Төртінші өнеркәсіптік революция жағдайындағы дамудың жаңа мүмкіндіктері» атты Жолдауына орай өткен идеологиялық активте айтылды. Жиында аймақ басшысы Қ. Көшербаев біздің алдымызда заман талабына сай озық ойлы ұрпақ тәрбиелеу міндеті тұрғанын атап өтті.
– Жақында ғана Қазан қаласында болып, Қызылорда облысының әкімдігі мен Татарстан Республикасы арасында ақпараттық технологиялар, ауылшаруашылығы, өндіріс, денсаулық сақтау және білім саласында тәжірибе алмасу мақсатында келіссөздер жүргіздік. Татарстан Республикасы бүгінде ақпараттық және сандық технологиялар дәуірінде осы бағыт бойынша тек ресейлік қана емес, посткеңестік елдер ішіндегі көшбасшы болып табылады, – деді аймақ басшысы.
Келешекте облыс жастарының Қазандағы ІТ-мамандар дайындайтын Иннополис айрықша экономикалық аймағында білім алуы үшін арнайы гранттар тағайындалады. Жуық арада өзара ынтымақтастық жөнінде бірлескен Жол картасы қабылданады.
Бүгінде Ресейдің жетекші техникалық жоғары оқу орындарында 500-ге тарта қызылордалық түлек жаңа технология бойынша білім алуда. Олар облыс экономикасына сандық технологияны енгізуде алғы шепте болары сөзсіз.
