ҰЛЫ ТҰЛҒАҒА – ЕЛ ҚҰРМЕТІ
Елбасының «Болашаққа бағдар: Рухани жаңғыру» бағдарламалық мақаласы тарихи тұлғаларды құрметтеу шараларына тың серпін бергені даусыз. Мақала аясындағы "Рухани жаңғыру" бағдарламасы алты жобаны біріктірсе, соның бірі «Туған жер» бағдарламасы мәдени мұраларды құрметтеу, ұлттық кодымызды сақтауға бағытталып отыр. Бағдарламалық мақала шеңберінде Қызылордада түбі бір түркі жұртының түгелдігін көксеп өткен Мұстафа Шоқайға ескерткіш тақта ашылды.
Облыс орталығы Перовск есімін иеленген тұста қалалық училище болған ғимаратта 1899-1902 жылдары ұлт ардағы Мұстафа білім алған екен. Қазір бұл нысанда «Аль-Асад» сауда үйі орналасқан.
- Бұл ұлы тұлғаға деген ел құрметінің белгісі болды. Елбасы бастамашы болған бағдарлама аясындағы шараларға елдің ықыласы ерекше, – дейді «Мұстафа Шоқай» қорының президенті Базарбай Атабай.
