ШЫҒАРМАШЫЛ ЖАСТАРҒА ШАБЫТ БЕРДІ
Елбасының «Болашаққа бағдар: Рухани жаңғыру» бағдарламалық мақаласына орай кеше Байқоңыр қалалық №274 орта мектебінің акт залында Қазақстан Республикасы Тәуелсіздігі күніне орай мүмкіндігі шектеулі өнерлі жандар арасында "Менің шығармашылығым" тақырыбында шығармашылық кеш өткізілді. Облыстық жастар саясаты мәселелері басқармасы және "Ашық Азаматтық Қоғам" ақпараттық-ресурстық орталығының ұйымдастыруымен өткен шараға қаланың белсенді жастары, облыстық, республикалық сайыстардың жеңімпаздары "Байқоңыр" жайдарманшылары қатысып, көрермендермен түрлі ойындар ойнатылды.
Өзінің шығармашылығын танытып, көрермендерді тәнті қылған мүмкіндігі шектеулі жастарға Қызылордадағы "Қолөнер" ұлттық орталығы, "ПромКоммерКА" ЖК директоры Аида Керімқұлова арнайы естелік сыйлықтар табыс етті. Бұл қолдау шығармашыл жастарға шабыт берді.
