БИЗНЕС-ЖОБАЛАРҒА ҚОЛДАУ КӨРСЕТІЛЕДІ
Қызылорда қаласының әкімдігі қаланың сол жағалауына жобаланған барлық бизнес жоспарларды бірге қарап, қолдау көрсетуге дайын, деп хабарлайды 24 kz телеарнасы. Бүгінгі таңда өңірде аумағы мың жарым гектарды құрайтын жаңа қаланың құрылысы басталып кетті. Қазірдің өзінде 18 көпқабатты тұрғын үй мен 320 орындық балабақша бой көтерді. Жалпы сол жағалауда 3 миллион шаршы метрден астам тұрғын үй, 16 мектеп, 12 бөбекжай, 4 денсаулық сақтау нысаны және сауда орталықтары салынады деп жоспарланған. Шіркейлі каналының үстінен көпір түсіп, сол арқылы «Батыс Еуропа-Батыс Қытай» автодәлізіне тікелей шығуға мүмкіндік туады. Облыстық кәсіпкерлер палатасы өз тарапынан кәсіп ашуға ниетті жандардың бизнес жоспарын тегін жасап бермек.
– Сол жағалау сәулетіне үлес қосам деген азаматтарға жерді аукцион арқылы тапсырып жатырмыз. Жер телімі бастапқыда 1 жылға беріледі. Құрылыс басталып, ары қарай қызу құрылыс қарқын алғаннан кейін өздерінің аттарына аударып береміз. Өйткені көп кәсіпкерлер, өкінішке қарай, жерді алады да құрылыс салынбай, бос тұрады. Сондай жағдай қайталанбас үшін 1-кезекте 1 жылға беріп жатырмыз,- дейді қала әкімі Нұрлыбек Нәлібаев.
