АРАЛДА ЖАС МҰҒАЛІМДЕРДІҢ СЛЕТІ ӨТТІ
Арал қаласындағы №262 мектеп-гимназияда «Заманауи педагог-жаңашыл тұлғаны қалыптастырушы сәулеткер» атты тақырыпта жас мұғалімдердің аудандық слеті өтті. Білім саласындағы үздік жастардың басын қосып, педагогикалық қызметте кездесетін мәселелерді оңтайлы шешу бағытында кеңестер беруді көздеген слетке облыстық кадрлар біліктілігін арттыру институтының оқытушысы С.Құсейінов, облыстық оқу орталығының жалпы орта білім беру бөлімінің меңгерушісі Г.Смағұлова және «Педагогикалық шеберлік орталығының» Қызылорда қаласы бойынша филиалының тренері Г.Жақсылықова, аудандық білім бөлімдерінің әдіскерлері мен жас мұғалімдер қатысты.
Слеттің ашылу салтанатында сөз алған аудандық білім бөлімі басшысының міндетін атқарушы С.Жанназарова жас мамандардың кәсіби біліктіліктерін арттыруда тәжірибенің маңызы ерекше екендін атап өтіп, жас мамандардан жаңашылдық пен ізденіс күтетінін жеткізді.
Жиынға қатысушылар алдымен қолөнер бұйымдарының көрмесін тамашалады. Осыдан кейін дәрістер мен топтық жұмыстарға кезек келді. Бұл бағытта Қызылорда облысы бойынша кадрлар біліктілігін арттыру институтының аға оқытушысы Серік Құсейіновтің «Оқытудың жаңа технологияларын сабақта қолданудың ерекшеліктері», «Педагогикалық шеберлік орталығының» Қызылорда қаласы бойынша филиалының тренері Г.Жақсылықованың «Жаңаша білім беру мазмұнын жоспарлау критериалды бағалау негіздері» атты дәрістерінің жас мамандарға берері мол болды.
Слетте топтық тренингтер мен жаңашылдық бағыттағы аудан ұстаздарының дәрістері ұйымдастырылды.
Шара аясындағы «Жырың болып төгілейін» атты поэзия кеші мұғалімдер арасында сөз өнерін серік еткен жастардың қатары мол екенін байқатты. Сондай-ақ, жас мұғалімдер жастар эстафеталық жарыстарға да қатысып, салауатты өмір салтының насихатшысы екендігін танытты.
