Kyzylorda-News.kz

     Астанада осы тақырыпты отандық және шетелдік ғалымдар өзара талқыға салып жатыр. Еліміздегі ғарыш күндеріне орайластырылған «Ғарышқа қазақстандық жол-2017» халықаралық форумына әлемнің 18 елінен 500-ге жуық мейман келді. Күнтізбе кестесі бойынша отандық ғарыш саласына инвестиция тарту және «Байқоңыр» ғарыш айлағының экологиялық қауіпсіздігін қамтамасыз ету мәселелері қаралады. Бұл туралы 24.kz хабарлайды.

    Қорғаныс және аэроғарыш өнеркәсібі министрлігі ұйымдастырған шара екі күнге жалғаспақ. Бүгін форумның ресми ашылуы мен пленарлық отырысында спикерлер өз баяндамаларын оқыса, ертең қатысушылар ынтымақтастық меморандумына қол қойып, шараны қорытындылайды.

    Осыдан 4 жыл бұрын басталған дәстүрлі семинар қатысушылардың көбеюі нәтижесінде халықаралық форумға айналып отыр. Ал кезекті халықаралық форум келер жылы мамыр айында KADEX-2018 қару-жарақ және әскери-техникалық мүлік 5-халықаралық көрмесі шеңберінде өткізіледі.

    - Біздің бағыт – экономикалық жағынан тиімді жобаларды іске асыру. Әзірге Айға немесе Марсқа ұшамыз деген жоспарларымыз жоқ. Біздің негізгі бағытымыз – ғарыш техникасын тек қана жасап, оны басқарумен айналыспай, соның экономика мәселелерін шешуге тиімділігін жоғарылату,-дейді ҚР Қорғаныс және аэроғарыш өнеркәсібі министрінің кеңесшісі Мейірбек Молдабеков.