Kyzylorda-News.kz

     Әлемдегі ең қауіпті мамандықтардың бірі – өрт сөндіруші қызметі. Өрт сөндірушіге қойылар басты талап – батылдық. Жалыннан жасқанбайтындардың әрдайым құрал-саймандары сақадай сай, дайындықтары жоғары болуы керек. Себебі, бұл іс сәл мүлт кетуді кешірмейді. Өрт шыққан жағдайда ең бірінші қоңырау дабылы осы мекемеге түседі. Арнайы тұтқада отырған кезекші диспетчер оқиға болған орынды анықтап, оқиға орнына бір жауынгерлік есеп  жіберіледі. Себебі, тонналап су тиеген бір көліктің күші жалынның бетін қайтаруға қауқарлы. Үй, қойма, зауыт тағы сол сияқты үлкен ғимараттар мен орманды алқаптар өртене бастаса, онда бірнеше өрт сөндіру көліктері, сонымен қоса өзге де көмекші техникалары жөнелтіледі. Кейде тікұшақтың да көмегіне жүгінетін кездер болады. Дабыл қоңырауы түскен жерге бірінші болып жеткен өрт сөндірушілер ең бірінші арнайы жеңді өрт гидрантына қосады. Қызыл жалынның беті қашан қайтатынын ешкім білмейді. Кейде жалынмен арпалыс бірталай күнге созылады.  

    Қызылорда облысы ТЖД мемлекеттік тіл және ақпарат бөлімінің бас маманы Айгүл Нұрманованың хабарлауынша Қызылорда қаласындағы №2 мамандандырылған өрт сөндіру бөлімінде өрт сөндірушілердің бір күндік жұмыс барысымен БАҚ өкілдері танысты. Журналистер қарауыл бастығы Жандос Рысбековтен тапсырма алып, өрт сөндірушілердің автокөлігін кезекшілікке тапсыру барысын көрді. Оқу сыныбындағы өрт сөндіру әдіс-тәсілдері сабағына қатысып, дәріс жазды. Демалыс бөлмесіндегі өрт сөндірушілердің спорттық жетістіктерін тамашалады. 

     БАҚ өкілдері мамандардың кезекті дабыл түсісімен өрт оқиғасына шығу барысын да көрді. Бір күннің ішінде қиын да, қызықты мамандықтың қыр-сырына қаныға түскендей болды. Бір айта кетерлігі, дәл осы күні осы бөлімге қарасты аумақта  ірі өрт оқиғасы тіркелген жоқ.