Kyzylorda-News.kz

     Бүгін Сырдария ауданындағы Нағи Ілиясов ауылдық округінде аудандық бюджет есебінен салынған ауыл әкімі аппаратының жаңа ғимараты пайдалануға берілді. Жаңа нысанның ашылу салтанатына аудан әкімінің орынбасары Балшекер Өтегенова бастаған атқарушы билік өкілдері қатысып, ауыл халқының қуанышына ортақтасты.

    – Сырдария ауданы соңғы жылдары дамудың даңғыл жолына түскені белгілі. Мемлекет басшысы Н.Ә.Назарбаевтың сарабдал саясатының арқасында ауданның экономикалық өсіп-өркендеуі жаңа белеске көтерілді. Алға қойған мақсат-міндеттер де уақытылы орындалып, нәтижелі жұмыстар жүйелі жүргізілуде. Бүгін ауданымызға қарасты Нағи Ілиясов ауылдық округінде жаңадан салынған ауыл әкімдігінің ғимараты пайдалануға берілді. Бұл бәріміз үшін, әсіресе ауыл тұрғындары үшін зор қуаныш! Жаңа нысанның халық игілігіне пайдалануға берілуі  ауылдың болашағы баянды, келешегі кемел екенін айшықтайды,- деген аудан әкімінің орынбасары ғимарат заман талабына сай қажетті құрал-жабдықтармен толық қамтамасыз етілгенін атап өтті.

    Жаңа нысанның ашылу салтанатында ауыл ақсақалы Керейтбай Мамытов көпшілікке бата беріп, әкімдік қызметкерлерінің жұмысына жеміс тіледі.