Kyzylorda-News.kz

     Кеше қазақ алфавитін латын қарпіне көшіру жобасы бағытында жұмыс істеп жатқан топ мүшелерімен кездесуде Мемлекет басшысы Н.Назарбаев мемлекеттік тілдің реформасы қоғамдық сананы жаңғырту бағдарламасындағы маңызды сұрақтардың бірі екенін атап өтті. «Осы күндері қазақ тілінің жаңа алфавитіне қатысты сауал көптің талқысына түсіп жатыр. Көптеген адамдар осы жұмысқа араласты. Латын әліпбиіне көшу туралы идея сонау тәуелсіздік алған жылдары туған еді. Қазақ тілін латын әліпбиіне көшіру туралы жұмыс менің ерекше бақылауымда болатын» деді Нұрсұлтан Назарбаев.

    Мемлекет басшысы атап айтқандай, латын әліпбиіне көшу процесі тарихи маңызға ие. Әлемде ешбір ел өзінің жаңа әліпбиін барша халқымен ортақ талқыға салған емес. Ал осы үрдісті бастап отырған Қазақстан үшін әрбір адамның ойын білу маңызды.

    Елбасы кездесуде қоғамдық бірлестіктер мен ғылыми ортаның, тұтас қоғамның жаңа алфавитті талқылауға белсенді түрде араласқанына назар аударып, бұл үдерістен жастар да шет қалмағанын айрықша атап өтті.

    Бұл біздің қоғамдағы жаңа буынға деген сенім мен құрмет деп білемін. Қазақ алфавитін латын әліпбиіне көшіру туралы ақпараттық-түсіндірме жұмыстарынан жастар да шет қалмайды, игілікті бастамаға өз үлесін қосады.