ҒЫЛЫМИ ЕҢБЕКТЕР ҚҰРЫЛЫМЫ ЖАЙЛЫ ҰСЫНЫМДАР ЖАСАЛДЫ
«Болашақ» университетінің ғылыми-зерттеу институты «Scopus базасындағы журналдарға мақала дайындау және жариялау» тақырыбында семинар өткізді. «Болашақ», Қорқыт ата атындағы ҚМУ профессор-оқытушылар құрамы қатысқан семинарды ҒЗИ директоры, саяси ғылымдар кандидаты, қауымдастырылған профессор М. Насимов жүргізді. «Scopus» - ғылыми басылымдарда жарияланған мақалалардың сілтемесін бақылауға арналған құрал және мәліметтердің библиографиялық және реферативті базасы. База техникалық, медициналық және гуманитарлық ғылымдар бойынша 5 мың баспа шығаратын 22 мың ғылыми журналдарды индекстейді. Мәліметтер базасында ғылыми журналдар, конференция материалдары мен сериялық кітаптар индекстеледі.
Бүгінде отандық ғылыми қауымдастық үшін аталмыш базада ғылыми мақала жариялау маңызды болып табылады. Ғылыми дәрежелер мен атақтар алу үшін міндетті түрде осы базадағы журналдарға ғылыми нәтижелер жариялануы керек. Семинар барысында базадан журнал таңдау және жариялау процестерінің барлық кезеңдері анықталды. Мақала дайындау және жариялау бойынша ғылыми еңбектер құрылымы туралы ұсынымдар жасалды.
Семинар соңында барлық қатысушыларға сертификаттар берілді.
