Kyzylorda-News.kz

     Кәсіби біліктілік, өз ісіне жауаптылық қашанда  қызметкердің мерейін үстем етеді. Осындай мамандар ашық жалынмен аянбай айқасатын өрт сөндірушілердің арасында өте көп. Солардың бірі  Кененбаев Бауыржан Төрешұлы.  Ол  1976 жылы Қызылорда облысы Шиелі ауданында дүниеге келген.  2010 жылы Қызылорда көпсалалы гуманитарлық-техникалық колледжін бітірген. Бүгінде №2 мамандандырылған өрт сөндіру бөлімінің бөлімше командирі. Азаматтық қорғау старшинасы  

     Бауыржан азаматтық қорғау органындағы қызметін 2004 жылдың тамыз айынан бастады. Ол қызмет атқару барысында өз міндетіне жауапкершілікпен қарап, берілген тапсырмалар мен бұйрықтарды уақтылы және сапалы орындайды. Бірнеше рет ірі өрттерді сөндіруге қатысқан.

    Мәселен, 2017 жылғы 6 сәуірде 14 сағат 39 минутта өрт сөндіру бөлімінің байланыс бекетіне Ә.Бөкейхан көшесі №74 үйдің 3-ші қабаты өртеніп жатқаны жайлы хабарлама түсті. №2 мамандандырылған өрт сөндіру бөлімінің қызметкерлері аталған мекен-жайда барлау жұмысын жүргізіп, 3-ші қабатының балконы түтіндеп жатқанын анықтайды.  

    Бөлімше командирі азаматтық қорғау старшинасы Б.Кененбаев  4-ші қабаттағы №52 пәтерден мүгедек әйелді автосаты арқылы құтқарды және 3-ші қабаттан 3 адамды баспалдақ арқылы қауіпсіз жерге көшірді.  

    Ол қызметке келгелі 12 жылдан асты дейтін болсақ, әр күн сайын оның қызмет барысы от-жалынды ауыздықтаумен өтеді. Б.Кененбаев әрқашанда өрт сөндіруде ұтымды шешім қабылдап, кәсіби шеберлігімен қайсарлығын көрсетіп, өрттің әрі қарай таралуына жол бермей, адам өмірін арашалап қалуға күш салады.  

    Осы өрт кезінде бөлімше командирі азаматтық қорғау старшинасы Б.Кененбаевпен бірге өртті сөндіруге адам өмірін құтқаруға атсалысқан жігіттің бірі  аға өрт сөндіруші-құтқарушы  азаматтық қорғау сержанты Н.Тұяқбаев болатын. Ол  ашық жалынмен жанып жатқан өрт ішінен бірнеше адамды құтқару жұмысында аянбай тер төкті.

     Нұрбол Тұяқбаев №2 мамандандырылған өрт сөндіру бөлімінің аға өрт сөндіруші-құтқарушысы. 1977 жылы Қызылорда қаласында дүние есігін ашқан.  1994 жылы  Қызылорда қаласы №7 кәсіптік-техникалық училищесін бітірген. 16 жылдан астам уақыт өрт сөндіруші болып қызмет етуде. Ірі өрттерді сөндіруге бірнеше рет қатысқан.

     Сондай кәсіби маманның бірі  Әбділдә Баекеев. Ол бүгінде ТЖД «Өрт сөндіру және авариялық-құтқару жұмыстары қызметінің» Өрт сөндіру және авариялық-құтқару жұмыстарын ұйымдастыру бөлімінің бастығы. Ол 1984 жылы Шиелі ауданында дүниеге келген. 2005 жылы Көкшетау техникалық институтын «Өрт қауіпсіздігі» мамандығы бойынша бітірген. Осы салада еңбек еткеніне 15 жылдан асқан. Өз ісінің кәсіби шебері ретінде алған білімін тәжірибеде ұтымды пайдаланып, өрт сөндірудің әдіс-тәсілдерін жетік меңгерген маман ретінде берілген тапсырмалар мен бұйрықтарды сапалы орындап келеді. Сонымен қатар гарнизондағы газ-түтіннен қорғау қызметі бекеттерінің жұмыс жағдайын, тыныс алуға жарамсыз ортада жұмыс жасау дайындық деңгейін арттыруға үлес қосып, «Ең үздік газ-түтіннен қорғау қызметі буыны», «Қауіпсіздік бекетшісі» сайысын жоғары дәрежеде ұйымдастыруда біліктілігін көрсете білді.  

    Жалыннан жасқанбайтын жігіттер төл мерекелері – құтқарушылар күнін де жұмыста өткізеді. Өйткені, олар үшін адам өмірі мен қауіпсіздігі бәрінен жоғары.