Kyzylorda-News.kz

     Қызылорда облысының жастар саясаты мәселелері басқармасының «Жастар ресурстық орталығы» КММ, Шиелі ауданы әкімдігі және Қорқыт Ата атындағы ҚМУ «Бизнес START» орталығы  «Жақаев ізбасарлары» Ақмаяда атты еңбек тынығу лагерін ұйымдастырды.

    Еңбек-тынығу лагерінің мақсаты  - белсенді жастарды еңбекке, кәсіпкерлікке, елжандылыққа баулуға, жастардың арасында достық қарым-қатынас орнатуға, көшбасшылық қасиеттерді шыңдауға, туған жерге деген патриотизмді нығайтуға және болашақ жас мамандарды ауылға жұмысқа шақыруға бағытталды.

     «Жақаев ізбасарлары – Ақмаяда»  еңбек-тынығу лагеріне қала мен ауыл жастары қатысты.

    Олар ең алдымен  Ы.Жақаев ауылындағы Ыбырай Жақаев атындағы тарихи-өлкетану музейінде болып, ата  ұрпағы Сейітбек Жақаевпен кездесіп сұхбаттасып, батасын алды.

    Келесі күннен бастап қыз балалар шаруашылықта сиыр сауса, жігіттер қора тазалаумен айналысты. Сондай-ақ, егістік басында 3 топқа бөлініп бидай екті,  масақ жинады, жиналған жерлерді өртеді және комбайндардың күріш құюына көмектесті.

    Қатысушылар үшін 3 күн қатарынан көшбасшылық пен кәсіпкерлікке байланысты семинар-тренингтер, тембилдингтер ойнатылды.

    Жастар қол күрестен, самаурынға шәй қоюдан, табаға нан жабудан, қыздар мен ұлдар арасында қашықтыққа жүгіруден марафон, арқан тартудан жарысып  және брейн-ринг сайысында сыналды.

     Бас демеуші, «Ақмая» ШҚ төрағасы, Шиелі аудандық мәслихатының депутаты Дәулет Жұмбеков лагер сарбаздарымен еркін форматта кездесіп, сұрақтарға жауап берді.

    Лагердің жабылу салтанаты Ақмая ауылдық мәдениет клубында өтті. Салтанатты кешке Қорқыт Ата атындағы ҚМУ-нің тәрбие және жастар саясаты мәселелері басқармасының басшысы Ж. Базартай, Шиелі аудандық ішкі саясат бөлімінің басшысы Б.Әбдіқадыров,  Қызылорда облысының жастар саясаты мәселелері басқармасының «Жастар ресурстық орталығы» КММ-нің бөлім басшысы Б.Қалиев, бас демеуші Д.Жұмбеков пен ауыл жастары, ауыл тұрғындары қатысты.

    Кеште Дәулет Жұмбековке облыс әкімінің орынбасары Руслан Рүстемовтің  алғыс хаты табысталды. Ұйымдастырылған сайыстардың қорытындысына сәйкес жеңімпаздар дипломдар мен медалдар иеленді.