Kyzylorda-News.kz

      А.Тоқмағанбетов атындағы қалалық мәдениет үйінде Ұстаздар мерекесіне орай «Ұстаздар – ұлы тұлғалар» атты салтанатты шара ұйымдастырылды.

    Шарада қала әкімі Н.Нәлібаев барлық ұстаздар қауымын мерекелерімен құттықтап, қала бойынша білім саласындағы жетістіктерге кеңінен тоқталды.

    - «Қазақылықтың қайнары, Алаштың – Анасы атанған аймақтың бұл бас қаласы – Қызылорда – кешегі алаш қайраткерлері мен ұлт зиялыларының басын қосқан киелі мекен! Қазақ тарихындағы талай бастамалар мен тың жаңалықтардың қасиетті ордасы.

    Біз осы абыройлы жолдан жаңылмай, алдағы уақытта да ел мүддесі үшін қызмет етер, басқа аймақтарға ұлттық болмысы және қазақылығымен үлгі боларлықтай ұрпақты тәрбиелеуіміз керек.

    Бұл жолда ұстаздар қауымының еңбегі мен алар орны ерекше.

     Сондықтан, ұстаз есімін ұлықтап, қадірі мен қасиетін құрметтеу – баршаға парыз. Ал, олардың жағдайын жасап, жақсылығын асыру – міндет.Ендеше, мұғалімдер күні - дәрежесі биік, ең ұлық та ұлағатты мереке, - деді қала әкімі Н.Нәлібаев

    Салтанатты шарада, бірқатар ұстаздар ҚР Білім және ғылым министірінің Құрмет грамотасы, облыс әкімінің, «Нұр Отан» партиясының Алғыс хаттарымен марапатталса, қала әкімі білім саласында еңбегімен еленген 10 мұғалімді 100 мың теңге сыйақы және Алғыс хаттармен марапаттады.