Kyzylorda-News.kz

     Қазалы ауданына жыл басынан бері тындырымды тірліктер атқарылып, елді-мекендер ажары артып келеді. Солардың бірі би әрі батыр Басықара бабаның есімімен аталатын ауылда ауқымды жұмыстар жасалуда. Биыл атап өтілетін Басықара бабаның 260 жылдық мерейтойы аясында ауылды абаттандыру жұмыстарына аудандық бюджеттен 121,8 млн. теңге қаржы бөлінген. Бөлінген қаржыға сәйкес ауылдың бас қақпасы жаңалануда. Ауылға кіреберістегі 618 метр жерге жарықшамдар қойылды. Қазір ауыл орталығынан «Басықара баба» атындағы аллея салынуда. Онда бабамыздың бюсті қойылмақ. Орталық алаң, жастар алаңы, балалардың ойын алаңының құрылыстары жүруде. Қадірбай Есенов пен Үрмәш Түктібаев атындағы екі көше асфальтталды.

    Ал Кеңес Одағының батыры Ү.Түктібаевтың 100 жылдығына орай батыр баба атындағы ауылды абаттандыру жұмыстарына бюджеттен 136,8 млн. теңге қаржы қаралған. Оның ішінде ауылды абаттандыру жұмыстарына аудандық бюджеттен 63 млн. теңге,  ауылдағы алты көшеге жөндеу жұмыстарын жүргізуге облыстық, аудандық бюджеттерден 76 млн. теңге бөлінді. Қазіргі таңда ауыл орталығынан «Тағзым алаңы» мен «Жастар» алаңы жасалуда. Жаңадан салынып жатқан «Тағзым алаңына» батыр бабамыздың бюсті қойылады. Сонымен қатар, ауылдық клубтың айналасы қоршалып, ауыл орталығындағы алты көшеге жөндеу жұмыстары жүргізілуде.

    Сонымен қатар, биыл Қазалы қаласының атауына 150 жыл толды. Бұл ретте қаладағы абаттандыру жұмыстарына бюджеттен 434,3 млн. теңге бөлінді. Бүгінге дейін қала көшелерінің қиылыстарына 5 комплект бағдаршам,  6 көшеге түнгі жарықшамдар орнатылды. «Жастар алаңының» құрылысы жүргізіліп жатыр. Алдағы уақытта «Ардагерлер алаңы» абаттандырылып, осы жерге қаланың 150 жылдығына арналған монумент орнатылады. Сонымен қатар, №18 жасөспірімдер спорт мектебінің ғимараты мен спорт алаңына абаттандыру жұмыстары жүргізілуде. Қаланың 4 орталық көшесіне жаяу жүргіншілер жолы мен бордюр салынуда. 5 көше орташа жөнделіп, 5 көшеге шағыл тас төселуде.