Kyzylorda-News.kz

     Бүгін №10 «Білім-инновация» лицей-интернатының «Жасұлан ұйымы» қаладағы Ардагерлер үйіне барып қайтты.

    Қ.Елеуова жетекшілік ететін лицейдің өнерпаз оқушылары Қарттар күніне орай «Ардагерлер – ел тірегі» атты мерекелік концерт қойды.

    Қазақ биімен ашылған концерттік бағдарлама әрі қарай оқушылардың жүрекжарды өлең шумақтарымен, ізгі тілектерімен, әсерлі әндерімен жалғасты. 9 А сынып оқушысы Шайық Жанельдің өз шығармашылығынан оқыған «Анама» атты өлеңі ардагерлерге айрықша ұнады.

    Ардагерлер өздерінің төл мерекелерінің қарсаңында құттықтап келген №10 «Білім-инновация» лицей-интернатының оқушыларына шын жүректен алғыс білдіріп, баталарын берді. Балалармен бірге ән шырқап, көңіл-күйлері көтерілді.

    Кеш соңынан ардагерлерге мерекелік торт тарту етілді. Бұл шара қай уақытта да үлкенін сыйлаған ұлы елдің ұрпақтары үшін рухани нәр алған кеш болды.