Kyzylorda-News.kz

     Қорқыт Ата атындағы Қызылорда мемлекеттік университетінің профессор-оқытушылары мен студенттері университет түлегі, халықаралық дәрежедегі спорт шебері Елдос Ермахановпен кездесу өткізді.  Ол жуырда Манилла (Филиппин) қаласында пауэрлифтингтен өткен Азия чемпионатында алтын жүлдені иеленіп, қазақ елінің туын көкте желбіреткен еді. Бұл туралы университеттің баспасөз қызметі хабарлады.

    Ұлттық құрама сапында ел намысын қорғап жүрген Елдос 66 келіге дейінгі салмақ дәрежесінде 217,5 келі зілтемірді көтеріп, 3 дүркін Азия чемпионы атанды. Сондай-ақ, ол классикалық, жатып көтеруден Азия чемпионатының күміс жүлдесін иеленді. Ол бұған дейін 9 дүркін Қазақстан чемпионы, 2015, 2016 жылдардағы 2 дүркін Азия чемпионы, 2013 жылғы жастар арасында әлем чемпионы, биылғы жылдың ересектер арасындағы әлем чемпионатының күміс және қола жүлдегері атанған, халықаралық дәрежедегі спорт шебері. Келесі жылы жас спортшы Финляндияда өтетін әлем чемпионатына қатыспақ.

    Кездесу барысында Елдос Ермаханов қатысушылар тарапынан қойылған сауалдарға жауап беріп, алдағы жоспарларымен бөлісті. Жиын соңында Елдос Ермахановқа «Үздік түлек» медалі табысталды.