ӨМІРІ ӨНЕГЕЛІ ҰСТАЗ
Қорқыт Ата атындағы Қызылорда мемлекеттік университетінің «Физика және математика» кафедрасында техника ғылымдарының кандидаты, профессор Қалиев Бақыт Қалиұлының 60 жасқа толған мерейтойына орай «Өмірі өнегемен өрнектелген ұлағатты ұстаз» тақырыбында салтанатты жиын өтті. Бұл туралы университеттің баспасөз қызметі хабарлады. Кездесу барысында ғалым-педагог Бақыт Қалиевтің өмірі мен ғылым жолындағы табыстары туралы әсерлі әңгімелер мен естеліктер айтылды. Университеттің кітапхана қызметкерлері ұйымдастырған ғылыми еңбектерінің көрмесі де жастарға үлгі боларлық татымды дүние болды.
Тағылымы мол жиында университет оқытушылары, магистранттар, студенттермен қоса, «Дарын» қосымша білім беру орталығы, облыс пен қала мектептерінде қызмет етіп жүрген шәкірттері Сыр өңіріне белгілі ғалымды мерейтойымен құттықтап, ізгі тілектерін білдірді.
