ЖАТТЫҒУ МАҚСАТЫ ОЙДАҒЫДАЙ ОРЫНДАЛДЫ
Қызылорда қаласындағы «Ақмешіт» сауықтыру кешенінде өрт-тактикалық оқу-жаттығу өтті. Нысанның жедел-тактикалық ерекшеліктерін зерттеуге арналған шарада оның сумен жабдықталуы тексеріліп, өрт сөндіру штабының пайдалану дағдыларын жетілдіруі сынға түсті. Оқу-жаттығудың тактикалық жоспарына сәйкес өрт электр кабелінің қысқа тұйықталуынан шықты. Кешен күзеті оқиға жайлы өрт сөндірушілерге хабар берді. Өрт сөндіру бөлімшелері ғимараттан адамдарды қауіпсіз аймаққа шығаруға кірісті.
Газ-түтіннен қорғау қызметінің мамандары ғимараттағы адамдарды алғашқы көмек көрсететін апаттық медицина орталығының қызметкерлеріне жібереді. Екі адамды эвакуациялау іс-әрекеттері өрт автосаты арқылы жүзеге асырылды.
Жарты сағаттың ішінде өрт жойылып, жалпы сапқа тұрғызу жарияланды. Өрт сөндіру қызметі бастығының орынбасары, азаматтық қорғау полковнигі Б.Қосмұратов өрт-тактикалық оқу-жаттығуға баға беріп, жұмылдырылған құрылымдардың жеделдігін атап өтті.
