УНИВЕРСИТЕТ СТУДЕНТТЕРІ АСТАНАДАҒЫ «ҚАЗАҚСТАН ЖОЛЫ: МӘҢГІЛІК ЕЛ» СЕМИНАР-ТРЕНИНГІНЕ ҚАТЫСТЫ
Астанада Қазақстан Республикасының тұңғыш Президенті кітапханасында «Қазақстан жолы: Мәңгілік Ел» семинар-тренингтерінің жаңа оқу маусымы ашылды. Оған Қорқыт Ата атындағы Қызылорда мемлекеттік университеті, Алматы қаласындағы Қазақ ұлттық аграрлық университетінің 50-ге жуық студенті қатысты. Бұл туралы унверситеттің баспасөз қызметі хабарлады.
Оқу маусымының алғашқы күнінде кітапхананың жетекші ғылыми қызметкері, философия ғылымдарының докторы, профессор Ғазиз Телебаев пен тарих ғылымдарының кандидаты Сағынтай Бердіғұлова дәріс оқыды. Ал келесі күні қатысушылар «Экономикалық шама: индустрияландыру және жалпыға бірдей еңбек қоғамы», «Идеологиялық шама: жалпы ұлттық бірлік, тарихи тұтастық және биік руханият» тақырыптары бойынша дәріс тыңдап, топпен жобалық жұмыс жасауды үйреніп, «Қазақстан жолы» интерактивті ғылыми-білім беру орталығында өтетін практикалық жаттығулар орындады. Сонымен бірге қатысушылар Елбасы кітапханасы мен ҚР Ұлттық мұражайын аралап, алған әсерлерімен бөлісті.
