ЛАТЫН ҚАРПІ ӘЛЕМГЕ ЖОЛ АШАДЫ
Елбасының латын әліпбиіне көшу бастамасындағы негізгі ұтымдылық – тіл ауыспай, таңбаның ауысуы. Қазіргі таңда әлемнің жетпіс пайызы латын әліпбиіне көшкен. Демек латынға көшу әлем өркениетіне біртабан жақындай түсу. Бүгін Өңірлік коммуникациялар қызметі ұйымдастырған брифингке қатысқан спикерлер осындай ой айтты. – Оның үстіне, қазіргі жастар көп тілді қатар меңгерген. Ал ағылшыншадан хабары бар адам үшін латын әліпбиіне көшу онша қиын емес, – деді облыстық түрік этно-мәдени бірлестігінің төрайымы Г.Гейдарова.
Бірлестік төрайымының айтуынша, мәжіліс талқылауына түскен жоба түрік тәжірибесіне ұқсас. Өйткені түбі бір елдің қолданысында да бірді-екілі дыбыс екі әріптің қосындысынан шығады.
«Нұр Отан» партиясы «Тұран» филиалы төрағасының бірінші орынбасары Есенжол Назаров ұсынылып отырған нұсқа тек жоба екенін қаперге салды. Ол әзірге халықтың талқысында.
– Партия филиалының барлық бөлімшесін осы бастамаға жұмылдырдық. Медиа-жоспар әзірленді. Спикерлер мен блогерлер тобы құрылды. Халықтың ой-пікірі, сын-ескертпесі жинақталып, тиісті орындарға жолданады, – деді Е.Назаров.
