ҚЫЗЫЛОРДАДА ЖАЛҒА ЗАҢСЫЗ БЕРІЛІП КЕЛГЕН 110 ПӘТЕР АНЫҚТАЛДЫ
Жергілікті полиция қызметкерлері қаладағы Өсербаев көшесінің бойында орналасқан жалға берілетін пәтерлерді тексеріп, рейдтік шаралар ұйымдастыруда. Жалпы құқық қорғаушылар жүргізген осы жұмыстар нәтижесінде жыл басынан бері ҚР ӘҚБтК-нің 449-бабы бойынша қоғамдық орындарда тиіскені үшін 37 құқық бұзушыға әкімшілік шара көрілсе, ҚР ӘҚБтК-нің 440-бабына сәйкес алкогольдік ішімдік ішкені немесе қоғамдық орындарға масаң күйде келген 29 адамға, ҚР ӘҚБтК-нің 437-бабына сәйкес тыныштықты бұзған 12 азаматқа, ҚР ӘҚБтК-нің 434-бабына сай ұсақ бұзақылық жасағаны үшін 14 тұрғынға әкімшілік хаттама толтырылды. Сонымен қатар аталған аумақта тұрғын үй қызметінің өкілдерімен бірлескен түрде тексеру жұмыстары жүргізіліп, 110 пәтердің жалға заңсыз берілгендігі анықталып, қалалық кірістер басқармасына ұсыныстар жолданды.
Облыстық ІІД баспасөз қызметінің хабарлауынша қазір күндізгі уақытта Өсербаев көшесінде учаскелік полиция инспекторларынан бөлек 1 экипаж қосымша бөлініп, күшейтілген жүйеде қызмет атқаруда.
Айта кетерлік жайт, қыркүйек айының 4-7 аралығында Жергілікті полиция қызметі, көші-қон полиция бөлімі, ұйымдасқан қылмысқа қарсы күрес басқармасы және Мемлекеттік кірістер басқармасы қызметкерлерімен аталған аумақта қысқа мерзімді жедел-профилактикалық іс-шара ұйымдастырылып, 24 әкімшілік құқық бұзушылық пен шетел азаматтарын тіркеу заңдылығын бұзудың 6 дерегі анықталды.
