ТУҒАН КҮНІҢМЕН, ҚЫЗЫЛОРДА!
Қызылордада қала күні 18-23 қыркүйек аралығында тойланады. Бұл туралы Өңірлік коммуникациялар қызметінде қала әкімінің орынбасары Шахмардан Байманов мәлімеді. Мереке қарсаңында, «Таза қала - жанға дауа», «Саябақтар шеруі» атты бір айлық экологиялық акциялар ұйымдастырылуда. Қала тұрғындары арасында«Таза көше», «Әдемі аула», «Үлгілі ауыл», «Әсем ғимарат» байқауы өткізіледі.
Ал, 18 қыркүйекте мерекелік апталық басталады. Жетіліктің алғашқы күні «Мерейлі мереке» деп аталады. Сол күні «Сыр сүлейлері» аллеясында «Қымыз, шұбат», «Қауын – қарбыз», «Бауырсақ» фестивальдері және аспазшылар байқауы ұйымдастырылады. «Сүйікті қалам Қызылорда» атты әуесқой және кәсіпқой фотосуретшілердің еңбектері көпшілік назарына ұсынылады. Алғашқы күннің қорытындысы ретінде орталық алаңда «I LOVE QYZYLORDA Диджей fest жастар кеші өткізіледі.
«Білімді ұрпақ – ұраным» болып бекітілген 19 қыркүйекте орталық алаңда этноауыл көрмесі, жас суретшілер байқауы, спорттық сайыстар өтеді. А. Тоқмағанбетов атындағы қалалық мәдениет үйінде мектеп оқушылары арасында республикалық шығармашылық өнер байқауы, фестиваль өткізіледі.
20 қыркүйек «Жүрек жылуы» күні ретінде бекітілді. Ол күн қайырымдылық шараларына арналмақ. Орталық алаңда болатын Қызылорда қаласының 199 жылдығына арналған «Тәтті тарту» атты көлемі 199 см торт пен тәтті тоқаштар таратылады. Демалыс паркіндегі ойын-сауық аттракциондары тегін қызмет көрсетеді.
21 қыркүйек «Салауатты ұрпақ – ел болашағы» деп белгіленген бұл күні «Сыр байк» атты велошеру, марафон, қазақша күрестен «Қызылорда батыры» атты турнирі, STREET WORKOUT-тан жарыстар ұйымдастырылады.
Қалада спорт алаңдарында бір мезгілде жастар мен жасөспірімдер арасында кіші футболдан «Туған күн» кубогі ойнатылады.
22 қыркүйек «Рухани, қазыналы Қызылорда» күні болып белгіленіп, мәдени-көпшілік шараларға ұласады. «Көңілді жолаушы» деп аталатын шара үлкен көліктерде өнерпаздар мен жолаушылардың бірге ән айтумен басталады. «Кітап бульвары» атты кітап жәрмеңкесі әдеби кешке ұласады.
«Сыр елінің сый - тартуы» болып бекітілген 23 қыркүйек күні аудандардың ауылшаруашылық өнімдерінің жәрмеңкесі ұйымдастырылады. Мерекелік аптаның қорытындысы ретінде «Келбеті көркем, келешегі кемел Қызылорда» атты Қазақстан эстрада жұлдыздарының қатысуымен Гала концерт өтеді.
