ҚАМШЫБЕК ҚОҢҚАБАЕВ – ӘЛЕМ ЧЕМПИОНАТЫНЫҢ КҮМІС ЖҮЛДЕГЕРІ!
Германияның Гамбург қаласында бокстан өткен 19-шы Әлем чемпионатында жерлесіміз Қамшыбек Қоңқабаев күміс жүлдені иеленді.
+91 келі салмақта сынға түскен Қамшыбек жарыс барысында төрт кездесу өткізіп, үшеуінде жеңіске жетті. Финалда әзербайжандық Магомедрасул Меджидовтен ұпай санымен жеңіліп, 2017 жылғы Әлем чемпионатының күміс жүлдегері атанды.
Айта кетейік, Қамшыбек дүбірлі бәсекеге алғашқы рет қатысты және бұл облыс тарихындағы ересектер арасындағы алғашқы жүлде болып есептеледі.
Қ.Қоңқабаев (18.11.1991 ж.) 2014 жылғы қарулы күштер арасында Әлем чемпионы, 2015 жылғы ҚР 4-ші жазғы спартакиадасының жеңімпазы, 2015 жылғы қарулы күштер арасында Бүкіләлемдік спорт ойындарының күміс жүлдегері, 2017 жылғы Азия чемпионатының күміс жүлдегері, көпдүркін халықаралық турнирлердің жеңімпазы, ҚР халықаралық дәрежедегі спорт шебері. Бапкері: ҚР еңбек сіңірген жаттықтырушысы Ғалымжан Байғұндиев.
Әлемнің 85 елінен 279 спортшы қатысқан бұл додада Қазақстан құрама командасы 1 алтын, 2 күміс, 3 қола жүлдемен жалпы командалық есепте үшінші орынды иеленді.
