РҮСТЕМ СЫБАЙ - УНИВЕРСИАДА ОЙЫНДАРЫНЫҢ КҮМІС ЖҮЛДЕСІН ИЕЛЕНДІ
Бүгін Қорқыт ата әуежайынан ауыр атлетикадан Универсиада ойындарының күміс жүлдегері Рүстем Сыбайды жерлестері қошеметпен күтіп алды. Қытайдың Тайбэй қаласында өткен Бүкіләлемдік жазғы Универсиада - 2017 ойындарында ауыр атлетикадан жерлесіміз Рүстем Сыбай күміс жүлдені иеленді. Жарыс барысында 94 келі салмақ дәрежесінде сынға түскен Рүстем екі жаттығудың нәтижесінде 382 келіні (170+212) бағындырды. Рүстеммен бірге облыстан 63 келі салмақта Әсем Садықова да қатысып, шеберлігін шыңдады.
Қызылорда облысының жоғары спорт шеберлігі мектебінде тәлім алатын Рүстемді жарысқа бапкері Евгений Пя дайындады.
Р.Сыбай – 3 дүркін Қазақстан жеңімпазы, I Жасөспірімдер жазғы Олимпиада ойындарының қола жүлдегері, Азия чемпионатының қола жүлдегері, ҚР IV жазғы Спартакиадасының жеңімпазы, Азия чемпионы, ҚР халықаралық дәрежедегі спорт шебері.
Ауыр атлетикадан облыстың аға жаттықтырушысы Нұржан Смахановтың айтуы бойынша, 20-30 қараша аралығында Американың Лос-Анджелес қаласында өтетін Әлем чемпионатына Сыр елінен Александр Зайчиков, Рүстем Сыбай және Әсем Садықовалар өнер көрсетеді.
