ЖАҢА КЛУБТЫҢ ҚҰРЫЛЫСЫ ЖҮРГІЗІЛУДЕ
Қазалы ауданында да жағымды жаңалықтар баршылық. Солардың бірі – жақын арада халық игілігіне беріледі деп отырған Қарашеңгел округіне қарасты Жалаңтөс батыр ауылдық клубы. Қазіргі таңда «Болашақ» ЖШС 150 орындық клубтың құрылысын жүргізуде. Құрылыс басталғалы бері ауылдың 5 тұрғыны тұрақты жұмыспен қамтылуда.
Қазіргі таңда Жалаңтөс батыр ауылдық клубы уақытша бұрынғы амбулатория ғимаратына орналасқан. Онда ән, би, домбыра және көркемсөз оқу үйірмесі жұмыс жасайды.
Ән үйірмесінде он төрт оқушы, би үйірмесінде он екі оқушы, домбыра үйірмесіне тоғыз оқушы қатысады. Сонымен қоса көркемсөз оқу үйірмесінде он оқушы тәлім алуда. Білуімізше, барлық өнерпаздар іс-шаралар мен байқауларға атсалысып отырады екен. Үйірме мүшелері ұйымдастырылып жатқан республикалық, облыстық, аудандық іс-шаралардан қалыс қалмай, өз өнерлерін көрсетіп, жүлделі орындарға ие болып жүргендігі көңіл қуантты.
Жаңа нысан пайдалануға берілгеннен кейін де жалаңтөстік өнерпаздар жоғары жетістікке толы жолынан жаңылмайтынына сеніміміз кәміл.
