Kyzylorda-News.kz

     Жақында  Жаңақорған ауданында «Көктемдегі мол су кезеңіне және су тасқынына қарсы дайындық шараларын жүргізу» тақырыбында облыстық командалық-штабтық оқу-жаттығу өткізілді.

    Оқу-жаттығу барысында аудандағы азаматтық қорғау қызметінің дайындығы,   су тасқынының алдын алу шарасы, қажетті инертті заттардың болуы, төтенше жағдай кезіндегі атқарылатын іс-әрекет тәртібі пысықталды. Су тасқыны орын алғанда бұқаралық ақпарат құралдары арқылы ол туралы халыққа ақпарат таратуы, төтенше жағдай орнында шұғыл атқаратын іс-қимыл дайындығы тексерілді.

     Төтенше жағдай кезіндегі халықты жинақтау бекеті - Жаңақорған кентіндегі №169 (ЭЖБ) мектебі мен халықты қабылау бекеті №163 (ЭҚБ) орта мектептегі халықты орналастыратын орны мен тәртібі нақтыланды.  Халықты қабылдаумен қатар, оларға психологиялық, медициналық көмек көрсету және зардап шеккендерді ыстық тамақпен қамту пысықталды.

    Қызылорда облысының Төтенше жағдайлар департаментінің қызметкерлері азаматтық қорғау қызметі жетекшілері мен ауылдық округ әкімдеріне түсіндіру жұмыстарын жүргізді.