ЖАЛАҒАШТА VII АУДАНДЫҚ СПАРТАКИАДА ӨТТІ
Орталық стадионда ардагерлер арасында жыл сайын дәстүрлі түрде өткізілетін VII аудандық спартакиада өтті. Спартакиадаға кент және ауылдық округтерден қатысқан 15 құрама команда 4 спорт түрі бойынша сынға түсті. Атап айтқанда, дартс, арқан тарту, қол күрес және жеңіл атлетика. Спартакиаданы аудан әкімінің орынбасары Ж.Тажмаханов ашып, қашанда құрметке лайықты жандардың келешек ұрпаққа үлгі-өнеге көрсетіп, салауатты өмір салтын ұстанып жүргендері үшін алғыс білдіріп, жарысқа қатысушы командаларға сәттілік тіледі. Әрдайым елдің қамын ойлап, намысын қорғаған, аудан халқына елеулі еңбек сіңірген ардақты ардагерлеріміздің аудан тарихында алатын орны ерек екенін тілге тиек етті.
Келесі сөз кезегін аудандық ардагерлер кеңесінің төрағасы С.Әлиев, жарыстың бас төрешісі М.Қарақұлов алып, жарыс додасына қатысушы ардагерлерге сәттілік тіледі.
Жарыс нәтижесі бойынша командалық есеп бойынша І орынды кент ардагерлері иемденсе, ІІ орынды білім саласының ардагерлері қанжығасына байлады. Ал жүлделі ІІІ орын Ақсу ауылдық округінен келген құрама командаға бұйырды. Жарыс жеңімпаздары арнайы дипломдармен және қаржылай сыйлықтармен марапатталды.
