ФАРМАЦЕВТИКАЛЫҚ ҚЫЗМЕТ БАҚЫЛАУДА
Облыста фармацевтикалық қызметпен 383 кәсіп иелері айналысады. Сауда объектілеріне 35 тексеру жүргізілді. Нәтижесінде әкімшілік заң бұзған мекемелерге 1134500 теңге айыппұл салынды. Бұл туралы бүгін Өңірлік коммуникациялар қызметінде өткен баспасөз конференциясында Фармация комитетінің облыстық департаменті басшысы Ғалия Байменова мәлімдеді. «Заңсыздық негізінен дәрілік заттарды сақтау және сату ережелерін бұзу, дәрі-дәрмектерде тегін белгісінің болмауы, жарамдылық мерзімдерінің өткендігі орын алған. Сондай-ақ, емдеу мекемелерінде келесі жылдың дәрілік заттарға қажеттілігі дұрыс анықталмаған», - дейді департамент басшысы.
Дәрілік заттардың бағаларын тұрақты ұстау туралы меморандум осы жылдың 31 желтоқсанына дейін іске асады. 2016 жылдан осы уақыт аралығында дәрілік заттардың бөлшек сауда бағалары орташа есеппен 14,4% көтерілген.
Сонымен қатар, баспасөз конференциясында Елбасы Жолдауының туындаған міндеттердің орындалуы, міндетті медициналық сақтандыру жүйесінің атқарылуы жайында да айтылды.
