АСТАНАДА ҚЫЗЫЛОРДАЛЫҚ ШАХМАТШЫ ӘСЕЛ СЕРІКБАЙ 15 ТАҚТАДА БІР МЕЗГІЛДІК СЕАНС ӨТКІЗДІ
Бүгін Астанадағы «ЭКСПО-2017» халықаралық мамандандырылған көрмесі аясында шахмат клубында қызылордалық шахматшы Әсел Серікбай 15 тақтада бір мезгілдік сеанс өткізді. Оған Қызылорда облысы әкімінің орынбасары Руслан Рүстемов қатысты.
- Бірнеше күннен бері Елордада Қызылорда облысының мәдени күндері өткізіліп жатыр. Соның аясында қызылордалық шахматшы Әсел Серікбайдың бір мезгілде 15 тақтада сеанс өткізу бағдарламасын енгізіп отырмыз. Бұл ойын өте ойлылықты, зерделілікті, терең қиялды қажет етеді. Сондықтан бүгінгі кездесу, бүгінгі ойын жас шахматшыларға ерекше әсер қалдырады деген ойдамыз,- деді Қызылорда облысы әкімінің орынбасары Руслан Рүстемов.
Әсел Серікбай - шахматтан облыс тарихында алғашқы ФИДЕ шебері, жасөспірімдер және жастар арасында 8 дүркін қазақстан чемпионы, жасөспірімдер арасында 3 дүркін Азия, оқушылар арасында 2 дүркін әлем чемпионы. Айта кетейік, Әсел осымен екінші мәрте сеанс өткізуде.
