ЕКІ КҮНДЕ 5 АДАМ СУҒА КЕТТІ
Облыста 2 тәулікте 5 адам суға кетті. Тілсіз жаудың құрьаны болғандардың екеуі бала. Бұл туралы бүгін Өңірлік коммуникациялар қызметінде Төтенше жағдайлар департаменті қызметкерлері өткізген жедел баспасөз мәслихатында мәлім болды. Оңтүстік өңірлік аэроұтқыр жедел құтқару жасағының басшысы Бақыт Ембергеновтің айтуынша, қайғылы оқиғаның барлығы да шомылуға арналмаған аймақтарда болып отыр.
8 тамыз күні Жалағаш ауданына қарасты Таң ауылындағы «Жанбасарық» каналында 7 жасар қыз суға кеткен. Дәл осы күні кешкі сағат 19.30-да құтқарушылар «Сталин» каналынан 17 жастағы жасөспірімнің мәйітін шығарды.
Екі күн өткенде Қармақшы ауданындағы «Бала Жарма» каналынан 9 сынып оқушысының денесі табылды. Сондай-ақ, құтқарушылар белгісіз себептермен суға кеткен екі адамның мәйітін тапты. Қазіргі таңда олардың жеке басын анықтау жұмыстары жүргізіліп жатыр.
ТЖД қызметкерлерінің айтуынша жыл басынан бері 24 адам суға кеткен. Оның 17-і суға түсу маусымында орын алған.
