ҚАЛАНЫҢ СОЛ ЖАҒАЛАУЫ ИГЕРІЛУДЕ
«Біз Қызылорда қаласының сол жағалау бөлігін игеруге барынша кірісіп кеттік. Қазірдің өзінде алғашқы болып 18 көпқабатты үйлерден тұратын шағын аудан, балабақша, жастарға қызмет көрсету орталығы, «Болашақ» университетінің студенттер қалашығы және басқа да әлеуметтік-мәдени нысандар құрылысы басталды» деді бүгін облыс әкімінің орынбасары Руслан Рүстемов Орталық коммуникациялар қызметінде ЭКСПО-2017 халықаралық көрмесі аясындағы Қызылорда облысының мәдени күндеріне байланысты өткен брифингте. Сондай-ақ, сол жағалауда салынатын Қазақ Орталық Атқару комитетінің (КазЦИК) тарихи ғимаратында музеймен бірге Елбасының рухани жаңғыру бағдарламасынан туындайтын міндеттерді жүзеге асыратын аймақтық Рухани жаңғыру орталығы қатар орналасатын болады. Сонымен бірге, сол жағалауда Жастар ресурстық орталығының жаңа ғимараты бой көтеріп, пайдалануға берілмек.
