КӘСІПКЕРЛЕР ПАЛАТАСЫ 6 АЙДА 150 КӘСІПКЕРДІҢ ҚҰҚЫҒЫН ҚОРҒАДЫ
Бұл туралы кәсіпкерлер палатасының бөлім бастығы Ерлан Әбдікеров айтты, деп хабарлайды палатаның баспасөз қызметі. Ерлан Әбдікеровтің айтуынша, палатаға жыл басынан бері бизнес өкілдерінен 97 өтініш түскен. Нәтижесінде 48 өтініш оң шешіліп, 150-ден астам кәсіпкердің құқығы қорғалды. Кәсіпкерлер палатасы заңгерлерінің араласуымен биылғы жылдың 6 айының өзінде кәсіпкерлердің 217 млн.теңгесі сақталып қалды және 8 лауазымды тұлға тәртіптік жауапкершілікке тартылды.
–Түскен шағымдардың 22 пайызы мемлекеттік және құқық қорғау органдарының қызметіне, 22 пайызы квазимемлекеттік орган қызметіне, 18 пайызы жер қатынастары, 10 пайызы салық салаларына қатысты, - дейді Кәсіпкерлердің құқығын қорғау және әкімшілік кедергілерді азайту бөлімінің бастығы.
Ерлан Әбдікеров оң шешілген мәселелердің маңыздыларына да тоқталып өтті.
- «ҚазТрансГазАймақ» АҚ Қызылорда облысиық филиалы тарапынан кәсіпкерге салынған 25 млн.теңгеден астам айыппұл жойылған;
- ҚР Ұлттық экономика министрлігі Табиғи монополияларды реттеу, бәсекелестікті және тұтынушылардың құқықтарын қорғау комитетінің Қызылорда облыстық департаменті тарапынан кәсіпкерге салынған 37 млн.теңге айыппұл жойылған.
Тәртіптік жауапкершілікке тартылған мемлекеттік орган өкілдері: көші-қон полициясы қызметкерлері, Арал ауданының мемлекеттік кірістер басқармасының басшысы мен бас маманы, Арал ауданының жергілікті полиция инспекторы.
Мұнан өзге, Кәсіпкерлер палатасы заңгерлері жыл басынан бері «Атамекен» ҰКП-на қолданыстағы заңнамалық актілерге өзгерістер мен толықтырулар енгізуге қатысты 20 ұсыныс жолдаған.
Егер кәсіпкер ретінде құқығыңыз бұзылған болса онда Кәсіпкерлер палатасының заңгерлері Сізді қорғауға әзір. Ол үшін 8 /7242/ 40-09-81 /ішкі 4319/ байланыс телефонына хабарласуыңызға немесе Қызылорда қаласы Әйтеке би көшесі 28 мекен-жайда орналасқан Кәсіпкерлер палатасына келіп, өтініш қалдыруыңызға болады.
