АЛҒАШҚЫ ЛЕКТЕ СЕГІЗ ЖҮЗ ҚОЗЫ ЭКСПОРТҚА ШЫҒАРЫЛАДЫ
Қызылорда облысы былтырдан бастап ет және ет өнімдерін экспортқа шығаруға мүмкіндік алды. Бұл аймақ шаруашылықтарының ауқымын кеңейте түсері сөзсіз. Мысалы бүгіннің өзінде жергілікті кәсіпкерлер Иран Ислам Республикасының «Inchen Cooperative, Inc» компаниясымен келісімге отырған. Соған сәйкес Сыр өңірінен биыл 10-15 мың қозы және ірі қара малын экспорттау көзделуде. Бұл туралы бүгін Өңірлік коммуникациялар қызметінде өткен баспасөз-конференциясында айтылды. ҚР Ауылшаруашылығы министрлігі сыртқа ет жөнелтудің индикативті жоспарын бекітті. Слған сәйкес Сыр өңірінен 25 тонна қой, 100 тонна сиыр етін экспорттау жоспарланған.
Облыстық ауылшаруашылығы басқармасы басшысының міндетін атқарушы, Пірмұхаммед Сыздықовтың айтуынша облыс аумағынан тірі қойларды экспорттау мәселесі толық шешімін тапты. Жаңақорған ауданындағы «Нұрболат» шаруа қожалығынан алғашқы 800 бас қозы шетелге жөнелтілуге дайын тұр.
