БІРІНШІ ОРЫН БІЗДІҢ ШАХМАТШЫЛАРДА
Астана қаласында шахматтан жасөспірімдер арасында «Astana Open - 2017» ҚР кубогының 4-кезеңі өтті. Дүбірлі додада Қызылорда облысының құрама командасы 19 команданың арасынан 27,5 ұпай жинап, бірінші орынды жеңіп алды.
Екінші орынды - 26 ұпаймен Алматы қаласы, үшінші орынды – 25 ұпаймен Астана қаласының спортшылары иеленді. Бұл туралы облыстық дене шынықтыру және спорт басқармасының баспасөз қызметі хабарлады.
Қызылорда облысының команда құрамында Сұлтан Аманжол (7,5 ұпай), Мейіржан Бармағанбетов пен Кәусар Али (7 ұпай) және Қуандық Кеңесовтер (6 ұпай) жақсы өнер көрсетіп, команданың алға шығуына өз үлестерін қосты.
Жекелей есепте 8 жасқа дейінгі қыздар арасында сынға түскен Кәусар Али жеңімпаз атанса, 14 жасқа дейінгі ұлдар арасында Сұлтан Аманжол 3-орынды еншіледі.
Жалпы жарысқа Астана, Алматы қалалары мен еліміздің барлық облыстарынан және Моңғолия, Қырғызстан, Өзбекстан мемлекеттерінен 470 спортшы бақ сынасты.
