Kyzylorda-News.kz

     Омарташыларды мемлекет тарапынан қолдау аясы арта түспек. Бал арасын өсірген шаруаларға субсидия беру шарттары биыл біршама жеңілдетілді. Мәселен, қаржылай көмекті бұған дейін 100 бал ара ұясы бар омарташылар ғана алатын. Енді бұл талап он есеге дейін кемітілді. Ол үшін омарташылар арнайы статистикалық органға тіркеліп, шаруашылығын растауы қажет, деп хабарлайды 24.kz.

    Субсидия асыл тұқымдандыру және селекциялық жұмыстармен айналысып отырған кәсіпкерлерге беріледі. Бұл ретте бал ара ұясын 270-ке жеткізген сырбойылық Сергей Вовк үшін мемлекеттік қолдау аясында өз кәсібін кеңейтуге мүмкіндік туып отыр. Сондай-ақ омарташы шаруашылыққа қажетті құрал-жабдықтар мен техникаларға да 50 пайыздық мөлшерлемеге дейін инвестициялық субсидия алудан үмітті.  

    - Бал ара ұясын 500-ге жеткізуді көздеп отырмын. Жақында бал өнімдерін сататын дүкен ашқанмын. Оны да кеңейткім келеді. Жалпы мұндай мемлекеттік қолдаулар бал ара бизнесін жаңадан бастағандарға үлкен көмек болар еді, - дейді омарташы Сергей Вовк.

    - Асыл тұқымдандыру және селекциялық жұмыстармен айналысуға мысалға 1 ұяға 10 мың теңге шығын кететін болса, олар 5 мыңға дейін субсидия алады. Мысалы, 100 бал ара ұясын ұстап отырған омарташы   500 мың теңге субсидия алады, - дейді облыстық кәсіпкерлер палатасы агроөнеркәсіптік кешені бөлімінің басшысы Жасұлан Серіков.