ТҰРҒЫН ҮЙ ҚҰРЫЛЫСЫ ҚАРҚЫНЫ БӘСЕҢДЕМЕЙДІ
«Нұрлы жер» тұрғын үй құрылысы бағдарламасы аясында тұрғын үй құрылысы мен инженерлік-коммуникациялық инфрақұрылым желілерін дамытуға мемлекеттік бюджет есебінен барлығы 5,5 млрд.теңге қаржы бөлінді, оның ішінде ҚР Ұлттық қорынан 4,4 млрд., ал облыстық бюджеттен 1,1 млрд.теңге бағытталып отыр. Бұл туралы құрылыс, сәулет және қала құрылысы басқармасының есебінде хабарланды. Басқарма есебіне сәйкес, облыста биыл жалпы ауданы 141,3 мың шаршы метрді құрайтын 41 көпқабатты тұрғын үйдің құрылысы жүргізілуде. Бұл жұмыстарға барлық қаржыландыру көздерінен 2 260,4 млн.теңге қаржы бөлінген.
ҚР Ұлттық қорынан 1 562,5 млн.теңге қаржы Қызылорда қаласы, Жаппасбай батыр көшесі №2 кварталындағы 160 пәтерлі №8 және 50 пәтерлі №16 тұрғын үйлердің құрылысы жұмыстарына бөлінді. Бүгінгі күні құрылыс-монтаж жұмыстары бекітілген кестеге сәйкес жүргізілуде.
Мұндағы 160 пәтерлі №8 тұрғын үй биыл пайдалануға берілсе, 50 пәтерлі №16 тұрғын үйге баспана кезегін күткендер келер жылы қоныстанады.
Осы жылғы 1 шілдеге дейін Қызылорда қаласы Жаппасбай батыр көшесі және Титов ауданындағы 16 тұрғын үй мен Сырдария ауданындағы 10 тұрғын үйдің құрылысына, Байқоңыр қаласында көппәтерлі 5 үйдің және Қызылорда қаласы Сырдария өзенінің сол жағалауында орналасатын 4 үйдің жоба-сметалық құжаттарын әзірлеп, мемлекеттік сараптамадан өткізу жұмыстарына облыстық бюджеттен бөлінген қаржы жоспарға сай игерілді.
