Kyzylorda-News.kz

      Биылдан бастап әлеуметтік дүкендерді тікелей тауарөндірушілер мен ауыл шаруашылығы кооперативтеріне беру тәжірибесі жүзеге асуда. Осыған сәйкес мамыр айында әлеуметтік дүкеннің біреуі сиыр етін өндіретін «Сыр маржаны» ЖШС –не берілді. Нәтижесінде, дүкен орналасқан аумақтағы сиыр етінің бағасы өзге сауда орындарымен салыстырғанда орташа 100 теңгеге төмендеді.

    Облыстық ауылшаруашылығы басқармасының мәліметінше, қазір қалада орналасқан тағы бір дүкен Шиелі ауданындағы «Мөлдір и К» құс фермасына берілді. Келесі әлеуметтік дүкенді сүт өнімін өндіретін ауыл шаруашылығы кооперативтеріне беру мәселесі қолға алынуда.

    Сонымен қатар, әлеуметтік дүкендер жүйесі ұлғайып жатыр. Биыл қосымша 5 жаңа әлеуметтік дүкен салынуы жоспарланған.

    Сонымен бірге, тұрғындарға төмен бағамен азық-түлік өнімдерін сатуды ұйымдастыру мақсатында облыс әкімі бекіткен кестеге сәйкес облыс және аудан орталықтарында сәуір айынан бастап апта сайын азық-түлік өнімдерінің жәрмеңкелері өткізілуде.

    Жыл басынан осы уақытта дейін  48 жәрмеңке өткізіліп, 320,18 млн. теңгенің  өнімі сатылды.