КӨЛІК ҰРЛАҒАНМЕН КӨПКЕ ҰЗАМАДЫ
Өз үйінің ауласында тұрған «KIA Cerato» маркалы автокөлігінен аяқ астя айырылып қалған қала тұрғыны құқық қорғаушыларға шағымданыпты. Аталған арыз негізінде жедел-іздестіру жұмыстары жүргізіліп, нәтижесінде 24 және 20 жастағы 2 азамат ұсталып, уақытша ұстау изоляторына қамаққа алынды. Оларға қатысты Қазақстан Республикасы Қылмыстық кодексінің 200-бабы 1-бөлігі негізінде қылмыстық іс қозғалып, басқа да қылмыстарға қатыстылығын анықталу үстінде, деп хабарлайды ОІІД баспасөз қызметі. Дәл осындай тағы бір дерекке қатысты іс те көп ұзамай ашылды. Бұл жағдайда әккі ұры «ВАЗ – 2107» маркалы автокөлік есігінің ашық қалғанын пайдаланып, белгісіз бағытқа қарай айдап кеткен. Полиция қызметкерлеріне бағыт-бағдар беріліп, іздестіру шараларының нәтижесінде 21 жастағы қала тұрғыны ұсталып, қалалық ішкі істер басқармасына жеткізілді. Оған да қатысты Қазақстан Республикасы Қылмыстық кодексінің 200-бабы 1-бөлігі негізінде қылмыстық іс қозғалды.
Осындай жағдайларды болдырмау үшін полицейлер облыс тұрғындарынан автокөліктерін қараусыз қалдырмауларын, қараңғы жерлерде ұзақ уақытқа тұраққа қоймауларын, құжаттар мен құнды заттарды автокөлік ішінде сақтамауларын ескертеді.
